ಗುರುವಾರ, ನವೆಂಬರ್ 29, 2012

ನಿನ್ನೆಸರು.

ಕೆಲಸವಿಲ್ಲದೇ ಖಾಲಿ ಕುಳಿತಾಗ
ಕೈಗೆ ಸಿಕ್ಕ ಪೆನ್ನು
ನಿನ್ನೆಸರ ಬರೆಯಲೊರಟು
ಕೈಬೆದರಿ, ಅಕ್ಷರಗಳು
ಒತ್ತಾಕ್ಷರಗಳ ನುಂಗಿಯೂ
ನುಂಗಲಾರದೇ ಗಂಟಲುಕಟ್ಟಿ
ಉಸಿರುಸಿಕ್ಕಿ ಹೊರಲಾಡಿ
ಬೆವೆತರೂ ಹೊರ ಬರದೆ
ಒಡಲೊಳಗೆ ಉಳಿಯಿತು
ನಿನ್ನೆಸರು..!!

ಏನಿದೆ ನಿನ್ನೆಸರಲಿ..?
ನೆನೆದೊಡನೆ ದಿಗಿಲಾಗಿ
ಎದೆಗೂಡಿಗೆ ಬೆಂಕಿಬಿದ್ದು
ನನ್ನತನವೆಲ್ಲಾ ಸುಟ್ಟು
ಕರಕಲಾಗಿ
ಕಿವಿಗಳು ಬಿಸಿಯಾಗಿ
ರೋಮಗಳು ಮುಳ್ಳಾಗಿ
ಕಣ್ಗಳ ತೇವವಾಗಿಸುವ
ಹೆಚ್ಚಲ್ಲದ ನಾಲ್ಕು ಗಣದ
ಮೂರು ಅಕ್ಷರಗಳು.

-ಶರತ್ ಚಕ್ರವರ್ತಿ.

ಬುಧವಾರ, ನವೆಂಬರ್ 28, 2012

ಸೂತಕ.

ಭಾವೋನ್ಮಾದದ ಬಸಿರುಕಟ್ಟಿ
ಪ್ರೇಮಕಾವ್ಯ ಬರೆವಾಗ
ದಟ್ಟಡವಿಯಲಿ
ನಟ್ಟನಡುರಾತ್ರಿ ಕೈಕೊಟ್ಟು
ದಿಕ್ಕೆಟ್ಟು ನಿಂತ ರೈಲಿನಂತೆ
ಮುಂದರಿಯದೆ ನಿಂತಿದೆ
ಪೆನ್ನು ; ಷಾಯಿ ಮುಗಿದು.

ಮಸಿಯಿಡಿದ ಗೌ..ಗತ್ತಲು
ಮೈಬಿಚ್ಚಿದ ಬಿಳಿಹಾಳೆ
ಪದಗಳಿಲ್ಲದ ಪ್ರೇಮಕಾವ್ಯ
ಶಕುನಗಳ ಅಪಶಕುನದಲಿ
ಮನವಿಡಿ ಸೂತಕದ
ಛಾಯೆ ; ಇದು ಒಲವ ಸಾವೇ..?

-ಶರತ್ ಚಕ್ರವರ್ತಿ.

ಮಂಗಳವಾರ, ನವೆಂಬರ್ 27, 2012

ಆರ್ತನಾದ

ನಾಲಿಗೆಯ ನರಸತ್ತುರುಚಿಸತ್ವದ ಸತ್ ಸ್ವರಗಳ
ಸ್ವರ ಹರಿದು ಸರಿಗಮಗಳು ಪರಿತಪಿಸಿ
ಸ್ವರಸಂಗಮಗಳು ಮುರುಟಿ 
ಮರುಗುತ್ತಿವೆ ; ಕೊರಗುತ್ತಿವೆ.
ಸವೆದ ತಂಬೂರಿಯ
ಒಡೆದ ದನಿ
ಆರ್ತನಾದವ ನುಡಿದು
ಅಪಶಕುನಕೆ ಶಕುನಗಳ ಕೂಡಿ
ಮಿಡಿಯದೇ ನುಡಿದಿದೆ ಮೌನವೀಣೆ
ಮುರಿದು ಬಿದ್ದಿದೆ ಹೃದಯಕೋಣೆ.

-ಶರತ್ ಚಕ್ರವರ್ತಿ.